Иртәгә Казанда Серов урамындагы бульварны ачачаклар

Иртәгә, 1 октябрьдә, 10:00 сәгатьтә ТР башкаласында Серов урамындагы бульварны ачу тантанасы булачак. Чара программасында архитекторлардан парк буйлап экскурсия, «Игелекле Казан» проектыннан гаилә спектакле күрсәтү һәм балалар арасында велосипедта йөрү оештырылачак.

Бу – шәһәрдә инвалидлар өчен тулысынча җайлаштырылган беренче иҗтимагый киңлек. Ул ял итү өчен рәхәт зоналар һәм җәяүлеләр өчен уңайлы инфраструктура тәкъдим итә.

Исегезгә төшерәбез, Шәһәр һәм республика көнендә яшь шәһәрлеләр өчен иң зур иҗтимагый киңлек – «Елмай» балалар паркы ачылды. 30 августта яңартудан соң халык шулай ук яңадан Фукс бакчасына килә алды.