В целях анализа посещаемости и улучшения работы портала мы используем сервис «Яндекс.Метрика». Оставаясь на нашем портале, Вы выражаете свое согласие на обработку Ваших данных указанным сервисом.
Яңалыклар
11.09.2022, 10:05
Гаиләләрнең попечительләре, хайваннар өчен приютлар, әйберләр кабул итү пунктлары һәм кан үзәге: Казанда ничек һәм кемгә булышырга
KZN.RU порталы теләге булган һәркем ярдәм итә ала торган хәйрия фондларын һәм оешмаларын туплады.
Фото: Марат Мөгыйнов
(Казан шәһәре KZN.RU, 11 нче сентябрь, Юлия Летникова). Ел саен 5 нче сентябрьдә Халыкара хәйриячелек көне билгеләп үтелә. Ул волонтерларны, меценатларны һәм барлык битараф булмаганнарны берләштерә, аларның катнашыннан башка хәйрия фондлары, хайваннар өчен приютлар, әйберләрне кабул итү пунктлары, кан үзәкләре һәм башка бик күп оешмалар эше мөмкин түгел. KZN.RU порталы Казанда ничек һәм кемгә ярдәм итү турында материал әзерләде.
«Игелекле Казан» проектлары
«Игелекле Казан» хәйрия фондларын, коммерцияле булмаган оешмаларны берләштерә һәм мөстәкыйль рәвештә 7 проектны тормышка ашыра: «Игелекле фудтрак», «Социаль няня», «Игелекле дулкын», «Яхшы куллар», «Игелекле велосипед», «Волонтерларны укыту» һәм «Игелекле эшләр көндәлеге». Оешма сәламәтлек мөмкинлекләре чикле балалары булган гаиләләргә булыша, мохтаҗларга кием бирә, билгеле бер яшәү урыны булмаган кешеләрне тукландыра һәм волонтерларны махсус балалар белән эшләргә өйрәтә.
Ничек ярдәм итәргә:
волонтер булырга, еш кына оешмага шоферлар, координаторлар, чаралар үткәрүдә ярдәм итү өчен администраторлар һәм фотографлар кирәк.
Балаларга ярдәм итәргә – «Альпари», Анжела Вавилова исемендәге фонд, «Ак Барс Созидание», «Кайгырту», «Балаларга»
«Альпари» хәйрия фонды балаларны медицина препаратлары, азык-төлек, мәктәп кирәк-яраклары белән тәэмин итә, психологик, юридик һәм башка төр ярдәм оештыра.
Ничек ярдәм итәргә:
волонтер булырга – гаиләне яисә учреждениене патронажга алу, авыру балага игътибар бирергә, моның өчен программа сайларга һәм «ярдәм тәкъдим итәргә» дигән төймәгә басарга кирәк;
Калинин урамы, 48, 107 нче офис адресы буенча китаплар, уенчыклар, дисклар, киемнәр, аяк киеме, эчке кием-салым, канцтоварлар китерергә;
иганә ясарга.
Анжела Вавилова исемендәге фонд каршында хоспис ачылды, аның карамагында катлаулы прогрессив авырулары булган 300 гә якын бала һәм 50 өлкән кеше бар. Хоспис – фонд эшчәнлегенең өстенлекле юнәлеше, ләкин ул шулай ук онкология белән авыручы балаларга ярдәм итә, аларны дәвалау өчен акча җыя.
Ничек ярдәм итәргә:
волонтер булырга, активистларны эзләү турында игъланнар фондның социаль челтәрләрендә бастырыла, мәсәлән, күптән түгел хоспис территориясендәге үсемлекләргә су сибү белән ярдәм кирәк иде;
хоспис ихтыяҗлары исемлегеннән әйберләр алып килергә, нәрсә кирәк икәнен учреждение номеры буенча белергә мөмкин: +7(843)237-75-66;
иганә рәсмиләштерергә.
Бүгенге көндә «Балаларга» хәйрия оешмасы «Хастаханә балалары» һәм «Иппотерапия» дигән социаль әһәмиятле ике проектны тормышка ашыра. Ел саен оешманың нянялары һәм волонтерлары Казан хастаханәләрендә 160 ятим сабый белән кизү тора, аларны госпитализмнан (баланы анадан аеру нәтиҗәсе булган үсеш патологиясе синдромы, аралашу һәм тәрбия кытлыгы аркасында килеп чыккан психик һәм физик артта калу – ред. искәрмәсе) саклый . Башка проект кысаларында – «Иппотерапия» – сәламәтлек үзенчәлекләре булган балалар атта дәресләр аша реабилитация узалар. Бүгенгә иппотерапияне 4 ат ярдәмендә үткәрәләр, ә дәресләргә 80 нән артык бала йөри.
Ничек ярдәм итәргә:
иганә рәсмиләштерергә.
«Ак Барс Созидание» хәйрия фонды сәламәтлек мөмкинлекләре чикле балалары булган гаиләләргә психологик-педагогик ярдәм күрсәтә, балалар өчен чаралар оештыра, кирәк-яраклар комплекты, азык-төлек җыелмалары тапшыра һәм башка программалар кысаларында ярдәм итә.
Ничек ярдәм итәргә: иганә рәсмиләштерергә.
«Кайгырту» инвалид балаларның ата-аналары оешмасы бушлай ял һәм йөзү буенча тренировкалар үткәрә, мәктәпкә җыенырга булыша, бәйрәмнәргә чакыра һәм «Социаль такси» проекты кысаларында транспорт белән тәэмин итә. Ай саен иҗат белән 60 сәламәтлек мөмкинлекләре чикле бала шөгыльләнә, ә йөзәргә 112 бала өйрәнә. Ел саен такси хезмәтеннән 3,6 мең пассажир файдалана, ә социаль-мәдәни реабилитацияне сәламәтлек мөмкинлекләре чикле балалары булган 4 мең гаилә уза.
Ничек ярдәм итәргә: иганә рәсмиләштерергә.
Авыр тормыш хәлләренә эләккән халыкка ярдәм – «Синең файдага», «Зәкят», «Игелекле эшләр көне»
«Синең файдага» хәйрия фонды яңа туган баласы булган гаиләләргә кием-салым, уенчыклар һәм тәрбияләү чаралары белән «Нәниләр тартмалары»н тапшыра, өлкәннәргә һөнәри юнәлешләрен алмаштырырга ярдәм итә, пенсионерларга медикаментлар, азык-төлек, кием-салым белән социаль пакетлар тапшыра, шулай ук үз проектлары кысаларында башка ярдәм күрсәтә.
Ничек ярдәм итәргә:
волонтер булырга;
иганә рәсмиләштерергә.
«Зәкят» хәйрия фондында мохтаҗлар беренче чиратта кирәк кием-салым һәм предметлар, шулай ук төшке аш ала ала. Моннан тыш, фонд акча җыю белән шөгыльләнә һәм катлаулы авырулары булган балаларны һәм өлкәннәрне дәвалау өчен акча белән ярдәм итә.
Ничек ярдәм итәргә:
иганә рәсмиләштерергә.
«Игелекле эшләр көне» хәйрия фонды кием-салым һәм аяк киеме бирүне, аз хәрәкәтләнүче кешеләрне ташуны оештыра, мастер-класслар үткәрә, ятим балаларны предприятие һәм оешмалар эше белән таныштыра, мохтаҗларга кайнар төшке ашлар тарата һәм сурдотәрҗемәчеләрнең театр куелышларында эшләвен тәэмин итә. Ел саен фонд складында 12 мең кеше әйберләр ала, ә социаль таксидан ай саен уртача 400 кеше файдалана.
Ничек ярдәм итәргә:
«Яхшы куллар» хәйрия складына кием-салым һәм аяк киеме тапшырырга;
иганә рәсмиләштерергә.
Йортсыз хайваннарга ярдәм – «Зооцентр», Kazan Shelters, «Люськин дом», «Теремок забота», «Помоги дворняге», «Котя», «Благие дела», «ЗооЗабота»
«Зооцентр» приютында төрле яшьтәге 600 гә якын эт бар – көчекләрдән алып зур йорт хайваннарына кадәр. Алар барысы да хуҗаларын көтә, ләкин әгәр дә сез хайванны өйгә ала алмасагыз, башка ысуллар белән дә ярдәм итәргә мөмкин. Приютка нәрсә кирәклеген +7(843)251-26-16 телефоны буенча ачыкларга була.
Ничек ярдәм итәргә:
хайванны сыендырырга;
волонтер булырга – этләр белән йөрергә һәм уйнарга, аларны карарга;
приютка кирәк булган әйберләрне – резин перчаткалар, юу чаралары, кәгазь сөлгеләр, швабралар, чиләкләр, табаклар һәм чүпрәкләр, 1,8 литрлы металл мискиләр, чүпрәк-чапрак һәм картон, көчекләр өчен уенчыклар, азык алып килергә.
Бүген Kazan Shelters приютында 56 эт һәм мәче бар. Ашату, дәвалау, карамактагыларны тәрбияләү кебек көндәлек эшләрдән тыш, приютка нигез салучылар ашыгыч рәвештә мәҗбүри күченү белән дә шөгыльләнәләр, бу чыгымнар өчен 300 мең сумга якын акча җитми.
Ничек ярдәм итәргә:
хайванны өйгә алырга;
хайван азыгы һәм ит алып килергә,
иганә рәсмиләштерергә.
«Люськин дом» приюты умыртка җәрәхәтләре булган 30 га якын мәчене кайгырта. Урамда җитди зыян күргән мәчеләр приютта икенче бәхетле тормышта яши башлый. Хайваннарны тиешле дәрәҗәдә карау өчен учреждениегә һәрвакыт ярдәм кирәк.
Ничек ярдәм итәргә:
волонтер булырга – мәчеләр белән уйнарга һәм яратырга килергә;
исемлек буенча кирәкле товарларны алып килергә;
иганә рәсмиләштерергә.
«Помоги дворняге» хәйрия фонды 500 дән артык этне һәм песине йортлы иткән. Хәзерге вакытта фондта сыендырырга мөмкин булган 30 дан артык хайван яши, аларның кайберләренең сәламәтлек үзенчәлекләре бар.
Ничек ярдәм итәргә:
хайванны сыендырырга;
приютка кирәкле әйберләрне алып килергә;
иганә рәсмиләштерергә.
«Котя» мини приюты урамда туган яки хуҗалары ташлаган мәчеләргә кабат йортлы булырга ярдәм итә. Күп кенә йорт хайваннарына дәвалау кирәк, әйтик, күптән түгел генә мәче баласының күзенә операция ясаганнар.
Ничек ярдәм итәргә:
хайванны өйгә алырга;
волонтер булырга, приютка интернетта яңалыклар тарату белән ярдәм итәргә;
приютка азык, наполнитель, пеленкалар алып килергә;
иганә рәсмиләштерергә.
Кан һәм сөяк мие донорлыгы
Бер кан тапшырганнан донор ике-өч пациентның гомерен саклап кала ала, моны Казанда ТР Сәламәтлек саклау министрлыгы Республика кан үзәгендә эшләп була. Сайтта «Донор светофоры» урнашкан, аның буенча хәзерге вакытта кайсы төркем канга ихтыяҗ булуын белергә була.
Ничек ярдәм итәргә:
кан бирергә – моны берничә адрес буенча эшләргә була: Җиңү проспекты, 85 (Кан үзәге), Оренбург тракты, 138б (Республика клиник хастаханәсе), Оренбург тракты, 140 (Республика балалар клиник хастаханәсе), Карбышев урамы, 12а (Төбәкара клиник-диагностика үзәге).
Спид.Центр мәгълүматлары буенча сөяк миен трансплантацияләү ел саен 5 меңнән артык россиялегә кирәк, шулардан 4214 күчереп утырту өлкәннәргә һәм 900 – балаларга. Бу эштә Казан халкы да ярдәм итә ала – шәһәрдә «Росплазма» донорлык үзәге ачылды.
Ничек ярдәм итәргә:
донорлар регистрына керергә – моның өчен паспорт белән Островский урамы, 69 адресы буенча килергә кирәк.
Шулай ук укыгыз
-
28.09.2025, 14:04 -
28.09.2025, 09:02 -
27.09.2025, 10:48 -
27.09.2025, 08:55