Татарстан яшьләренә театрларга һәм музейларга бушлай йөрү өчен «Пушкин картасы» бирә башлаячаклар

Федераль программада катнашучылар өч мең сумлык махсус банк картасы алачак.

Фото: Денис Гордийко

(Казан шәһәре KZN.RU, 17-нче август). 1-нче сентябрьдән Татарстанда «Пушкин картасы» федераль яшьләр программасы эшли башлаячак. 14 яшьтән 22 яшькә кадәрге республика халкы мәдәни чараларга билет сатып алу өчен акча ала алачак, дип хәбәр итте бүген ТР Министрлар Кабинетында узган брифингта ТР мәдәният министры Ирада Әюпова.

Программада катнашучыларга өч мең сумлык махсус банк картасы биреләчәк, аларны ел дәвамында сарыф итәргә мөмкин булачак. Киләсе елда карта номиналы биш мең сумга кадәр арттырылачак. Бу акчага бөтен ил буйлап музейларга, театрларга, концерт залларына, филармония һәм китапханәләргә билетлар сатып алырга мөмкин булачак. Мәдәни чаралар исемлеге pro.культура.рф порталында урнаштырылачак. Программага 800-дән артык федераль, төбәк һәм хосусый мәдәният учреждениеләре кушылачак, алга таба катнашучылар исемлеге киңәйтеләчәк.

Программадан файдалану өчен, республика халкына үз телефонына «Дәүләт хезмәте. Мәдәният» мобиль кушымтасын урнаштырырга, дәүләт хезмәтләре порталы аша теркәлү узарга һәм «Пушкин картасын» алырга кирәк булачак («МИР» түләү системасының виртуаль яки пластик картасын). Шуннан соң кызыклы чараны афишадан сайлап алырга һәм кушымтада, мәдәният учреждениесе сайтында яки кассада билет алырга мөмкин.

Бүгенге көндә Татарстанда программага 68 мәдәният өлкәсе оешмасы, шул исәптән 16 театр, 21 музей һәм галерея, 11 Мәдәният сарае һәм клуб, 6 концерт мәйданчыгы, 1 цирк һәм 13 башка учреждение кушылган, дип сөйләде И.Әюпова.

«Пушкин картасы» программасын Россия Федерациясе Президенты Владимир Путин «Туры линия» барышында 2021 елның июнендә игълан итте.

Шулай ук укыгыз

Барлык яңалыклар