«Чисталык марафоны»: Зөбәрҗәт күл янында экологик чара

Программада – күл тирәсен чүптән арындыру, квест, команда ярышлары, концерт һәм кыр кухнясы

Бу шимбәдә, ягъни 20 нче сентябрь көнне Зөбәрҗәт күл янында экологик чара уза. Казанлылар өчен квест, ярышлар, бәйгеләр, шулай ук концерт һәм кыр кухнясы оештырыла, дип хәбәр итә Киров һәм Мәскәү районнары администрациясе матбугат хезмәте.

Шәһәр халкы Зөбәрҗәт күлен чүптән арындыру өмәсенә кушыла ала. Чарада катнашучыларның кәефен күтәрү максатыннан өмәдә, җыештыру белән бергә, күңелле квестлар, чүп калдыкларын төрләргә бүлү буенча команда ярышлары каралган, өмәчеләр шулай ук кыр кухнясында пешкән тәмле ботка белән сыйланып, концерт карый алачак. Катнашучыларга төрле бәйгеләр тәкъдим ителә, интерактив мәйданчыклар да эшләячәк.

Акциядә катнашу өчен 4 кешелек команда туплап 18 нче сентябрь сәгать 12:00 гә кадәр сылтама аша теркәлергә кирәк.

Чараны уңайлы итү өчен казанлыларга махсус бушлай автобуслар бирелә. Теләге булганнар Габдулла Тукай урамы, 64 һәм Красное село урамы, 51 (КДЭУ тукталышы) адреслары буенча иртәнге сәгать 8:30 да бушлай трансфер белән Зөбәрҗәт күлгә барып җитә ала.

Чара Россия күләмендәге «Яшел Россия» кампаниясе һәм илкүләм «Экология иминлеге» проектының «Россия суы» акциясе кысаларында уза.

Шулай ук укыгыз

Барлык яңалыклар