Казанның азык-төлек һәм социаль туклану департаменты органика эшкәртү өчен компостер сатып алырга планлаштыра

Хәзер предприятие азык-төлек калдыкларын фермерларга тапшыра

Органик калдыкларны утильләштерүгә шәһәрнең азык-төлек һәм социаль туклану департаментында яңа ысул кертеләчәк. Предприятие комбинатында органика өчен компостер урнаштырылачак. Хәзер оешма, макулатура һәм пластикны да кертеп, икенчел чималның 50% тан артыгын эшкәртүгә җибәрә, ә барлык азык-төлек калдыкларын фермерларга тапшыра. Бу хакта эшлекле дүшәмбедә департаментның генераль директоры Рима Мөхәммәдшина хәбәр итте.

«Без бу тема белән җитди шөгыльләндек. Узган атнада гына без бизнес-берләшмә белән мондый компостер урнаштыру турында фикер алыштык. Органик калдыклар барлык калдыкларның өчтән берен тәшкил итә. Шәһәр никадәр иминрәк булса, ул шулкадәр күбрәк органик калдыклар хасил итә. Хәзер без калдыкларны эшкәртү комплексын күздә тотабыз. Ә Horeca (кунакханә-ресторан бизнесы — ред. төз.) белән барысын да җыячакбыз һәм компостлаштырачакбыз. Башта без практиканы мәктәп туклануы комбинатында сынап карыйбыз, ә аннары компостер «Горводзеленхоз» МУП базасында барлыкка киләчәк. Без бу мәсьәләне хәл итәргә өметләнәбез», — диде Казан мэры Илсур Метшин.

Рима Мөхәммәдшина аңлатканча, калдыкларны киметү өчен департамент балаларның ихтыяҗларын исәпкә алып туклану җәдвалын төзегән. «Тәмле итеп әзерләнгән кайнар ризык шулай ук азык калдыклары санын киметергә ярдәм итә», – дип билгеләде спикер.

Моннан тыш, мәктәп ашханәләрендә икенчел чималны акыллы куллануның һәм утильләштерүгә җаваплы ысулның мөһимлеге турында сөйләүче плакатлар бар. «Акыллы туклану» экосистемасы өчен яңа вариантлар эшләнә, мәсәлән, транспорт маршрутларын төзүне автоматлаштыру системасы кертелгән, ул машиналарны нәтиҗәлерәк файдаланырга мөмкинлек бирәчәк.

Мәктәп җитәкчелеге инициативасы белән «Директор карточкасы» хезмәте булдырылды, ул белем бирү учреждениесе администрациясе тарафыннан укучыларның туклануын тикшерү системасын яхшырта. Казанда сәламәт яшәү рәвешен таныту өчен өлкән сыйныф укучылары арасында сәламәт туклану вәкилен билгеләү проекты башлана. Әлеге программа дөрес туклану укучылар тормышының аерылгысыз өлешенә әверелә торган, аларда үз сәламәтлекләренә һәм киләчәккә аңлы мөнәсәбәт тудыручы мохит булдыруга юнәлдерелгән.

«Департаментның ата-аналар, укытучылар, мәктәп директорлары белән әңгәмә коруы бик мөһим. Монда кире элемтә яхшы көйләнгән — хезмәткәрләр һәрвакыт ата-аналарның сорауларына җавап бирергә әзер», — дип ассызыклады Илсур Метшин.