Илсур Метшин Игорь Крутойга Истәлек билгесе тапшырды

Казан мэры композиторның шәһәр үсешенә керткән өлешен билгеләп үтте

Казан Ратушасында шәһәрнең күренекле кешеләрен хөрмәтләү тантанасы узды, аның барышында Казан мэры Илсур Метшин танылган композитор, Россиянең халык артисты Игорь Крутойга Истәлек билгесе тапшырды.

Илсур Метшин катнашучыларга мөрәҗәгать итеп, Татарстан башкаласын үстерүдә уртак тырышлыкларның әһәмиятен ассызыклады. «Безнең җитәкчеләр салган нигездә Казанның нинди булуы күренә. Төп үзгәрешләр Казанның 1000 еллыгыннан башланды, аннан соң Универсиада, Су спорт төрләре буенча дөнья чемпионаты, WorldSkills, БРИКС саммиты булды. Һәм боларның барысы артында, матур исемнәрдән тыш, кешеләр тора. Безне хуплаган президентка рәхмәт», — дип билгеләде Казан мэры.

Шәһәр башлыгы Игорь Крутойның Казанның мәдәни тормышына керткән өлешенә һәм шәһәргә «Новая волна» («Яңа дулкын») халыкара яшь башкаручылар фестиваленең килүенә аерым игътибар бирде.

«Бүген без көткән нәрсә булды: безгә «Новая волна» («Яңа дулкын») килеп җитте. Мин махсус ясалган Истәлек билгесен дустыбыз Россиянең халык артистына тапшырырга телим», — диде Илсур Метшин, бүләкне Игорь Крутойга тапшырганда.

Җавап сүзендә Игорь Крутой рәхмәт белдерде һәм хезмәттәшлектән алган тәэсирләре белән уртаклашты. «Барлык проектлар өчен дә горурланабыз: Казан әлеге чаралар яктылыгында бөтенләй башкача күренә. Бергә тоткан җаваплылыгыбыз өчен рәхмәт», – дип билгеләп үтте композитор. Ул шулай ук Татарстан башкаласында чараны оештыру һәм артистларны кабул итү дәрәҗәсен ассызыклады. «Артистларны болай кабул итү Юрмалада да, Сочида да беркайчан да булмады – Казанда әле бу бары тик беренче ел гына уздырыла!» — диде Игорь Крутой.

Композитор проектның Казанда беркетелүенә чын күңелдән өмет белдерде. «Мин бу проектның Казанда калуын, кешеләрнең шундый югары дәрәҗәгә шатлануын бик теләр идем. Бу бергә эшләүдә алга бару өчен зур мөмкинлек», — дип ассызыклады ул. Күрсәтелгән ышаныч өчен рәхмәт белдереп, Игорь Крутой канәгатьлек белән «беренче коймак көймәде», дип билгеләп үтте, уртак фикерләрнең уңышлы гамәлгә ашырылуын ассызыклады.